ସଂଘର୍ଷରୁ ସଫଳତା : ଉଦଳାରୁ ଓଡ଼ିଶା ମଞ୍ଚ ପର୍ଯ୍ୟନ୍ତ ଉଦଳାର ଝିଅ ଉପାସନା ସାହୁ

ଉଦଳା ୨୯/୦୪/୨୦୨୬-ମୟୂରଭଞ୍ଜ ଜିଲ୍ଲାର ଉଦଳା ଅଞ୍ଚଳରୁ ଆସିଥିବା ପ୍ରତିଭାଶାଳୀ ଗାୟିକା ଉପାସନା ସାହୁ ନିଜ ଅସାଧାରଣ କଣ୍ଠସ୍ୱର, କଠିନ ପରିଶ୍ରମ ଓ ଅଦମ୍ୟ ଇଚ୍ଛାଶକ୍ତି ଦ୍ୱାରା ଓଡ଼ିଶାର ସଙ୍ଗୀତ ଜଗତରେ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଛନ୍ତି। ଏକ ସାଧାରଣ ପରିବାରରୁ ଆସିଥିବା ଉପାସନାଙ୍କ ଜୀବନ କାହାଣୀ ଆଜି ହଜାର ହଜାର ଯୁବପିଢ଼ୀଙ୍କ ପାଇଁ ପ୍ରେରଣାର ଉତ୍ସ ହୋଇଉଠିଛି।
ଉପାସନା ସାହୁଙ୍କ ପିତା ଶିବ ଶଙ୍କର ସାହୁ ଓ ମାତା ରେବତୀ ସାହୁ। ଛୋଟବେଳୁ ସଙ୍ଗୀତ ପ୍ରତି ତାଙ୍କର ଅସୀମ ଭଲପାଇବା ଥିଲା। ଘରେ କିମ୍ବା ସ୍କୁଲର କୌଣସି କାର୍ଯ୍ୟକ୍ରମ ହେଉ, ସେ ସବୁବେଳେ ଗୀତ ଗାଇ ସମସ୍ତଙ୍କ ମନ ଜିତୁଥିଲେ। କିନ୍ତୁ ତାଙ୍କ ସ୍ୱପ୍ନ ପୂରଣର ରାସ୍ତା କେବେବି ସହଜ ନଥିଲା।
ତାଙ୍କ ପିଲାବେଳେ ଉଦଳା ପରି ଏକ ସହରରେ ଉଚ୍ଚମାନର ସଙ୍ଗୀତ ଶିକ୍ଷା ପାଇଁ ବହୁତ ସୁବିଧା ନଥିଲା। ଆର୍ଥିକ ଅଭାବ ହେତୁ ଭଲ ଗୁରୁ, ଭଲ ସଙ୍ଗୀତ ଅନୁଷ୍ଠାନ ଓ ପ୍ରଶିକ୍ଷଣ କେନ୍ଦ୍ରର ଅଭାବ ତାଙ୍କ ସଂଘର୍ଷକୁ ଆହୁରି କଠିନ କରିଥିଲା। ଅନେକ ସମୟରେ ସେ ଟେଲିଭିଜନ ଓ ମୋବାଇଲରେ ଗୀତ ଶୁଣି ନିଜେ ନିଜେ ଅଭ୍ୟାସ କରୁଥିଲେ। ସଠିକ୍ ମାର୍ଗଦର୍ଶନ ନଥିଲେ ମଧ୍ୟ ସେ ନିଜ ସ୍ୱପ୍ନକୁ କେବେ ଛାଡ଼ିନଥିଲେ।
ଏହା ସହିତ ପରିବାରର ଆର୍ଥିକ ଅସ୍ଥିରତା ମଧ୍ୟ ତାଙ୍କ ପାଇଁ ବଡ଼ ବାଧା ହୋଇଥିଲା। ଘରର ପରିସ୍ଥିତି ସବୁବେଳେ ସୁବିଧାଜନକ ନଥିବାରୁ ସଙ୍ଗୀତ ଶିକ୍ଷା, ଯାତାୟାତ ଓ ପ୍ରତିଯୋଗିତାର ଖର୍ଚ୍ଚ ଯୋଗାଡ଼ କରିବା ଅତ୍ୟନ୍ତ କଷ୍ଟକର ହୋଇପଡ଼ୁଥିଲା। ତଥାପି ଉପାସନାଙ୍କ ପିତାମାତା ତାଙ୍କ ଝିଅର ସ୍ୱପ୍ନ ପାଇଁ ସମ୍ଭବ ସବୁ ପ୍ରୟାସ କରିଥିଲେ। ଅନେକ କଷ୍ଟ ସତ୍ତ୍ୱେ ସେମାନେ ଉପାସନାଙ୍କୁ ସାହସ ଓ ପ୍ରେରଣା ଦେଇଥିଲେ।
ନିଜ ଅସାଧାରଣ ପ୍ରତିଭା ଓ ନିରନ୍ତର ପରିଶ୍ରମର ଫଳସ୍ୱରୂପ ଉପାସନା ସାହୁ ଓଡ଼ିଶାର ଲୋକପ୍ରିୟ ସଙ୍ଗୀତ ରିଏଲିଟି ଶୋ “ମୁଁ ବି ନମିତା ଅଗ୍ରୱାଲ ହେବି” ସିଜନ-୧ ରେ ପ୍ରଥମ ରନର୍ସ ଅପ୍ ହୋଇ ସମଗ୍ର ରାଜ୍ୟର ଦୃଷ୍ଟିଆକର୍ଷଣ କରିଥିଲେ। ତାଙ୍କ ସୁମଧୁର କଣ୍ଠସ୍ୱର, ଭାବପୂର୍ଣ୍ଣ ଗାୟନ ଓ ମଞ୍ଚ ଉପସ୍ଥାପନା ଦର୍ଶକମାନଙ୍କ ହୃଦୟ ଜିତିନେଇଥିଲା।
ଏହା ପରେ “ସ୍ୱର ମହାସଂଗ୍ରାମ” ଭଳି ଏକ ବଡ଼ ସଙ୍ଗୀତ ମଞ୍ଚରେ ମଧ୍ୟ ସେ ନିଜ ପ୍ରତିଭାର ପ୍ରମାଣ ଦେଇଥିଲେ। ତାଙ୍କ ଗୀତ ଶୁଣି ବିଚାରକ ଓଦର୍ଶକମାନେ ଅନେକ ପ୍ରଶଂସା କରିଥିଲେ ଓ ସେହି ସୋ ରେ ମଧ୍ୟ ସେ ପ୍ରଥମ ରନର୍ସ ଅପ୍ ହୋଇଥିଲେ। ଧୀରେ ଧୀରେ ସେ ଓଡ଼ିଆ ସଙ୍ଗୀତ ଜଗତରେ ଏକ ପରିଚିତ ନାମ ହୋଇଉଠିଛନ୍ତି।
ଉପାସନାଙ୍କ ସଫଳତା କେବଳ ତାଙ୍କ ପରିବାର ପାଇଁ ନୁହେଁ, ସମଗ୍ର ଉଦଳା ଓ ମୟୂରଭଞ୍ଜ ଜିଲ୍ଲା ପାଇଁ ମଧ୍ୟ ଗର୍ବର ବିଷୟ। ଗ୍ରାମାଞ୍ଚଳରେ ରହିଥିବା ଅନେକ ପ୍ରତିଭାଶାଳୀ ଯୁବକ ଯୁବତୀଙ୍କ ପାଇଁ ସେ ଆଜି ଏକ ଜୀବନ୍ତ ପ୍ରେରଣା। ସେ ପ୍ରମାଣ କରିଦେଇଛନ୍ତି ଯେ, ସୁବିଧା କମ୍ ଥିଲେ ମଧ୍ୟ ଦୃଢ଼ ଇଚ୍ଛାଶକ୍ତି, ପରିଶ୍ରମ ଓ ଆତ୍ମବିଶ୍ୱାସ ଥାଇଲେ ସଫଳତା ନିଶ୍ଚିତ ଭାବେ ମିଳେ।
ସ୍ଥାନୀୟ ଲୋକମାନେ ମଧ୍ୟ ଉପାସନାଙ୍କ ସଫଳତାକୁ ନେଇ ଗର୍ବ ଅନୁଭବ କରୁଛନ୍ତି। ସେମାନଙ୍କ କହିବା ଅନୁସାରେ, ଉପାସନା ଆଜି ମୟୂରଭଞ୍ଜର ନାମକୁ ରାଜ୍ୟସ୍ତରରେ ଉଜ୍ଜ୍ୱଳ କରିଛନ୍ତି। ତାଙ୍କ ଜୀବନ ସଂଘର୍ଷ ଓ ସଫଳତା ଆଗାମୀ ପିଢ଼ୀଙ୍କୁ ନୂତନ ସ୍ୱପ୍ନ ଦେଖିବାର ସାହସ ଦେଉଛି।
ଆଗାମୀ ଦିନରେ ଉପାସନା ସାହୁ ଓଡ଼ିଆ ସଙ୍ଗୀତ ଜଗତରେ ଆହୁରି ବଡ଼ ସଫଳତା ହାସଲ କରିବେ ବୋଲି ସମସ୍ତଙ୍କ ଆଶା ଓ ବିଶ୍ୱାସ ରହିଛି।