ସବୁଜ ଭବିଷ୍ୟତ ଗଠନର ସଂକଳ୍ପ: ନାଗପଡ଼ାରେ ବିଶ୍ୱ ପରିବେଶ ଦିବସ ପାଳିତ
ବୃକ୍ଷରୋପଣ, ସଚେତନତା ରାଲି ଓ ପରିବେଶ ସୁରକ୍ଷା ପାଇଁ ସମୂହ ଶପଥ
କୋମନା: ୦୫/୦୬ (କଳିଙ୍ଗ ଫୋକସ) ଗିରେନ୍ଦ୍ର ଜଗତ/କଶ୍ୟପ ଜଗତ: ବିଶ୍ୱ ପରିବେଶ ଦିବସ ଅବସରରେ ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ ନାଗପଡ଼ା ଗ୍ରାମରେ ଏକ ବ୍ୟାପକ ସଚେତନତାମୂଳକ କାର୍ଯ୍ୟକ୍ରମ ଉତ୍ସାହ ଓ ଉଦ୍ଦୀପନାର ସହ ଅନୁଷ୍ଠିତ ହୋଇଯାଇଛି । ସ୍ୱାମୀ ବିବେକାନନ୍ଦ ଯୁବ କ୍ଲବ, ନାଗପଡ଼ାର ଆୟୋଜନରେ ଏବଂ ଆରସିଡିସି (RCDC)ର ସହଯୋଗରେ ଆୟୋଜିତ ଏହି କାର୍ଯ୍ୟକ୍ରମ ପରିବେଶ ସୁରକ୍ଷା ପ୍ରତି ଗ୍ରାମବାସୀଙ୍କ ମଧ୍ୟରେ ନୂଆ ଉତ୍ସାହ ସୃଷ୍ଟି କରିଥିଲା । କାର୍ଯ୍ୟକ୍ରମରେ ଗ୍ରାମର ଯୁବକ-ଯୁବତୀ, ଶିଶୁ, ମହିଳା ଏବଂ ବିଭିନ୍ନ ସମୁଦାୟର ସଦସ୍ୟମାନେ ବହୁ ସଂଖ୍ୟାରେ ଯୋଗଦେଇ ପରିବେଶ ସୁରକ୍ଷା ପାଇଁ ସମୂହ ଶପଥ ଗ୍ରହଣ କରିଥିଲେ । ଆରମ୍ଭରେ ଏକ ବର୍ଣ୍ଣାଢ୍ୟ ସଚେତନତା ରାଲି ଗ୍ରାମ ପରିକ୍ରମା କରିଥିଲା । ରାଲିରେ ଅଂଶଗ୍ରହଣକାରୀମାନେ “ଗଛ ଲଗାଅ, ପରିବେଶ ବଞ୍ଚାଅ”, “ପ୍ଲାଷ୍ଟିକ ଛାଡ଼, ପ୍ରକୃତିକୁ ଭଲପାଅ” ପରି ବିଭିନ୍ନ ସଚେତନତାମୂଳକ ସ୍ଲୋଗାନ ଦେଇ ପରିବେଶ ସୁରକ୍ଷାର ବାର୍ତ୍ତା ପ୍ରଚାର କରିଥିଲେ । ପରେ ଗ୍ରାମର ବିଭିନ୍ନ ସାର୍ବଜନିକ ସ୍ଥାନ, ବିଦ୍ୟାଳୟ ପରିସର ଏବଂ ରାସ୍ତା ପାର୍ଶ୍ୱରେ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ଫଳଜ, ଔଷଧୀୟ ଓ ଛାୟାପ୍ରଦାନକାରୀ ବିଭିନ୍ନ ପ୍ରଜାତିର ଚାରା ରୋପଣ କରାଯିବା ସହ ସେଗୁଡ଼ିକର ସୁରକ୍ଷା ଓ ଯତ୍ନ ନେବା ପାଇଁ ମଧ୍ୟ ସଂକଳ୍ପ ଗ୍ରହଣ କରାଯାଇଥିଲା । ଉପସ୍ଥିତ ବକ୍ତାମାନେ କହିଥିଲେ ଯେ, ବଢ଼ୁଥିବା ପରିବେଶ ପ୍ରଦୂଷଣ ଓ ଜଙ୍ଗଲ କ୍ଷୟ ଆଜି ସମଗ୍ର ବିଶ୍ୱ ପାଇଁ ଚିନ୍ତାର ବିଷୟ ହୋଇପଡ଼ିଛି । ଏପରି ସ୍ଥିତିରେ ବୃକ୍ଷରୋପଣ ଓ ପରିବେଶ ସୁରକ୍ଷା ପ୍ରତି ସାମୂହିକ ସଚେତନତା ହିଁ ଏକ ସୁସ୍ଥ ଓ ସବୁଜ ଭବିଷ୍ୟତ ଗଠନର ମୂଳ ଆଧାର ବୋଲି ସେମାନେ ମତ ପ୍ରକାଶ କରିଥିଲେ । ଏହି କାର୍ଯ୍ୟକ୍ରମରେ ଯୁବକ ସଂଘ, ଶିଶୁ ସଂଘ, ଶିଶୁ ସୁରକ୍ଷା କମିଟିର ସଦସ୍ୟମାନଙ୍କ ସହ RCDCର ଫିଲ୍ଡ କୋ-ଅର୍ଡିନେଟର ସନ୍ଦୀପ କୁମାର ନାଗ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ । ଗ୍ରାମବାସୀଙ୍କ ସକ୍ରିୟ ସହଭାଗିତା ଓ ସମୂହ ପ୍ରୟାସରେ ଆୟୋଜିତ ଏହି କାର୍ଯ୍ୟକ୍ରମ ପରିବେଶ ସୁରକ୍ଷା ପ୍ରତି ଏକ ସକାରାତ୍ମକ ବାର୍ତ୍ତା ପ୍ରଦାନ କରିବା ସହ “ଗୋଟିଏ ଗଛ, ଗୋଟିଏ ଜୀବନ”ର ମହାନ ସନ୍ଦେଶକୁ ଆହୁରି ସୁଦୃଢ଼ କରିଥିଲା ।
